17 March, 2011

البعو رجع تاااانى

بما انى واحدة من المصريين اللى قرروا يقولوا نعم فى الاستفتاء و شايفة انه عادى يعنى ده رأيى اللى انا مقتنعة بيه اصدقاء الفيس بووك كان ليهم رأى تانى خاااالص، غالباً هم شافوا انى اتعبطت ازاى اكون موافقة ان الأخوان الاستنهازيين اللى مصحابين ابو رجل مسلوخة و ام اربعة و اربعين يحكموا مصر حاولت اتفاهم ان دى الديمقراطية اننا نسلم بأمر الاغلبية قالولى لاااااا انت مسمعتيش كل الناس المحترمة بيقولوا لا قلتلهم فى محترمين برضوا بيقولوا نعم لكن هيهات انا بكلم نفسى و غالباً اعتبرونى اتهبلت او ارتديت و بدأت كومنتات النصح و الارشاد و اللى اكتشفته من الكومنتات دى و من كلام بعض السياسين فى التوك شو اننا رجعنا تانى لنفس طريقة الابتزاز السياسى

حسنى مبارك طلع تلاتين البلد بحجة الضربة الجوية و بطل الحرب و السلام و يا اما انا يا الاسلاميين و تضيع مصر

و بعد الثورة يلا ننقل البلد لسلطة مدنية .... بلاش حكم العسكر، اقروا التاريخ فسيناريو 1954 قابل للتكرار لاااااا مينفعش و حق الشباب اللى قام بالثورة و لازم يعملوا احزاب و يا اما نستناهم تحت حكم عسكرى يا الاسلاميين و الاخوان حيحكموكم

يا نهااااار ملوش ملامح حد يشرحلى و ينورنى لو انا غلطانة بجد حاجة تجيب اكتئاب الثورة كانت ثورة مصر لم تكن ملك لأحد

و لما الاخوان و السلفيين وحشيين و بيخوفوا كدة و استنهازيين و كل البلا الازرق اللى عماله اسمعه ممنعهومش ليه يدخلوا ميدان التحرير كلنا نعلم جيداً ان لولا الله ثم الاخوان لكان قضى على الثورة يوم الاربعاء الدامى و شباب الاخوان كانوا جزء من ائتلاف شباب 25 يناير، المظاهرات كانت تتحرك فى الاسكندرية من جامع القائد الابراهيم و هو جامع يحسب على السلفيين.
يا ريت نرجع اخلاق الميدان تانى الظاهر انه كان حلم صحينا منه على صراعات سياسية بلا قلب

16 March, 2011

Voting Yes cause am convinced :)

لا صوت يعلو فوق صوت الاستفتاء اه ولا لا ..... خلونا نتفق اننا كلنا واقفين فى نفس المكان (كلنا مصريين بنحب بلدنا و عايزين الافضل) و عايزين نفس الهدف دستور جديد الخلاف الوحيد انا حمشى من الزمالك و انت حتمشى من جاردن سيتى كل واحد فينا سمع النشرة المرورية فى نجوم اف ام و مقتنع تماماً ان سكته اامن و اسهل انا مش حرغى كتير انا حاحاول ارد على النقاط الاساسية للناس اللى بتقول لا

التصويت بنعم حيرجع دستور 71 بكل عيوبه و كمان التعديلات فيها غلط عشان المادة 190 بتحدد الفترة الرئاسية ب6 سنين فى حين احنا خليناها 4
لا يمكن الدستور يرجع و ده اتقال من احد قادة المجلس العسكرى فى المصرى اليوم امبارح و من واحد تانى فى المجلس الرئاسى مع خيرى رمضان النهاردة التعديلات فقط لعبور الانتخابات و سوف تضم لاعلان دستورى مؤقت

انا شايفة ان دى خطوات اكثر وضوحاً و عارفة انا بعمل ايه و رايحة فين الجيش مش حيسلم السلطة فى مصر الا لسلطة شرعية هو قال الكلام ده من اول يوم و المجلس الرئاسى اللى الناس عايزاه يتعمل مش سلطة شرعية



انا عايزة الدستور يتكتب تحت سلطة مدنية شرعية مش تحت حكم عسكرى



كلام يحيى الجمل ده رأيه الشخصى مش بيان حكومى فمش حقدر اعتمد عليه



الثورة طلعت قوتين الجيش و الشعب و كنا قوتين اد بعض كل م الوقت بيعدى الزخم الثورى بيقل و الجيش بيقوى انا عايزة الجيش يمشى فى اسرع وقت



لو صوتنا بنعم قانون مباشرة الحقوق السياسية و قانون الاحزاب و قانون يحدد طريقة الانتخابات هى حتكون بالكوتة ولا فردية كل ده حيصدر فى حال قلنا نعم



نيجى بأه للفزاعة الكبرى الاخوان المسلمين و قصة الاستعجال فى الانتخابات حتجيب الاخوان و الحزب الوطنى عشان هما بس اللى منظمين


الحزب الوطنى لما كان حزب حاكم عمره م نجح غير بالتزوير و البلطجية اكيد مش حينجح دلوقتى



فضل كدة ميزان القوة بين الاخوان و الاحزاب، الاخوان ال30 سنة اللى فاتت كانت جماعة محظورة و كل قيادتها فى المعتقلات و برغم كل ده عملوا ارضية جيدة جدااااً فى حين احزاب زى الوفد اللى هو تاريخياً اقدم من الاخوان و باقى الاحزاب مكنتش محظورة و لم تفعل شئ فى الشارع احزاب كرتونية بلا شعبية و بالنسبة لى كل وظيفتها انها كانت كومبارس النظام و سقطت بسقوط النظام تفتكرى لو قعدنا سنة كمان مين شعبيته حتزيد اكتر



اقروا التاريخ سنة 1954 نزلوا المصريين يهتفوا ضد الديمقراطية و من ساعتها لبسنا فى الجيش فى وضع اخشى ان يتكرر تانى ف التاريخ دائماً ما يعيد نفسه



دى اهم نقط مش كل حاجة حتخلينى اقول نعم

26 February, 2010

صلى الله عليه و سلم


يا من انشق له القمر و سجد له الشجر و كلمه الحجر و هامت به قلوب البشر
اشهد الله انى احبك يا خير من خلق ربى
اللهم صلى و سلم و بارك على سيد الخلق

25 February, 2010

كل سنة و انتم طيبين المولد بكرة

ايام ماتش مصر و الجزاير قلبنا الدنيا احنا و الأخوة فى الجزاير و قطعنا بعض على ماتش كورة و نزعتنا الوطنية كانت فى السما لكن لما الحرم الابراهيمى و مسجد سيدنا بلال يضموا للمقدسات اليهودية كووووووووول ولا كأن حاجة حصلت مش تبعنا الحاجات دى ما هو احنا فراعنة و هما بربر .....كل سنة و انتوا طيبين المولد بكرة اشتروا حلاوة بس ح...د يقولى لما نقابله صلى الله عليه و سلم فوق حنقوله ايه

21 August, 2009

رمضان كريم

سلام عليكم احباب النبى
ساعات قليلة و تبدأ ايام الرحمة "اللهم بلغنا رمضان"
يااااااه ده بجد فاضل فجر، ظهر و عصر و مع اول تكبيرة لآذان المغرب تبدأ ليال الرحمة.......يا الله

اطلعوا بصوا على السما شايفين حالكة السواد مستنية هلال الرحمة، هلال المغفرة، هلال العتق، هلال رمضان ينور الدنيا كلها
ركزوا شوية,,,,,, سامعين .....صرير اصوات جهنم تغلق و ريح الجنة يهب يا رب بلغنا رمضان

عايزكم النهاردة ورقة و قلم و تحضروا دعواتكم، لما تدعوا ادعوا باى حاجة مهما كانت كبيرة و مهما كان شكلها صعب التحقيق احنا بنقول يا رب يبقى اى حاجة ينفع تتطلب

عايزين نروح رمضان بقلب سليم، قلب عارف عيوبه، عارف نزواته و هفواته و متيقن ان مفيش حد يقدر يطهره غير الرحمن، قلب بيدعى انه يرجع تانى لربنا، تعالوا نكلم ربنا كتير رمضان ده، نفضفض بين ايديه تبارك و تعالى

مش عارفة فهمتونى ولا لا بس جوايا مشاعر كتيييييير و شوق اكبر، شوق انى بجد اكون كويسة، ان الدنيا تطلع من قلبى عشان تعبت شوق لربنا

ادعو ربنا كل سجدة و متنسوش الاقصى من دعائكم

اللهم بلغنا رمضان

29 January, 2009

ملايكة من غزة

بتول....بجد ملاك عندها سنتين و نص وصلت مصر تصارع الموت بس الحمد لله دلوقتى كويسة لم تغتال قذيفة الصهاينة برائتها بعد، فكرتنى ببنتى اووووى نفس السكوت بس عيون بتفط منها الشقاوة قعدت فى حضنى و قرينا قصة الحمد لله انها كانت فى عربيتى، شدت شيكولاتاية كانت فى ايدى و هيا بتقول تاعت بتول


فرج....بجد قلبى راحله مع ان صعب اوووى يشدنى ولد فى سن التاسعة "سن من اغلس سنين الصبيان" لكن ضحكته لازم تاخد قلب اى ام و اعتقد اى حد، وعدته انى حرجعله تانى و قلتله اجيبلك ايه بندقية قالى "لا كفانا طاخ بدى سيارة بريموت" و ادانى شيكولاته من عنده "اخدتها منى بتول :)" صحيح اصيب بقذيفة دبابة و استشهد 2 من اخواته و اخوه الكبير على السرير الملاصق له و فى بلد غريب بعيد عن امه فى الظروف دى و فى السن ده لكن ابتسامته احيت جوايا كل امال الدنيا و اكديتلى ان ابداً لن ينهزم هذا الشعب

محمد....اخو فرج الكبير عمره 11 سنه حسيته فاهم اوووى اللى بيحصل و مستوعبه فلم يكن ببراءة بتول و فرج حزين و خجول لكن قوى بالرغم من حداثة سنه و فداحة مصابه متماسك جدااااً حسيت ان نفسه عزيزة اوووى مش عايز حد يجيى يعطف عليه فهو اقوى من هذا فاحترمت جداااً عزة نفسه و قوته

بالرغم من انى قضيت فترة مش قليلة من عمرى جوا غرفة العمليات بحكم الشغلانة "محسوبتكم دكتورة تخدير" الا ان الولاد دول اثروا فيا اووووى فغلبتنى دموعى، يمكن مجرد الاحساس بالعجز قدامهم، احساس انا مش عارفة اعملكم حاجة مش حقدر اكون زيكم مش عارفة احاسيس كتير متداخلة حزن على حالهم و حالنا، احساس بالقهر، و مجرد احساس ام ان دول اولادها
الملايكة دول فى مستشفى الشيخ زايد التخصصى الدور السابع بجد زيارتهم جميلة

كلمة وجعتنى اوووى النهاردة اخو بتول و المقيم معها فى المستشفى كنا بنعزم عليه ياكل معانا عشان يبقى بينا عيش و ملح فقال "احنا بين دم دلوقتى فدمكم يجرى فى عروقنا" ياااااااه اد ايه وجعتنى الكلمة و حسستنى اد ايه الناس دى مقدرة حاجة ابسط من انها لا تذكر بجد حسسنى اد ايه احنا وحشين و مقصرين

17 January, 2009

و اخدنا على أفانا

من اول يوم عدوان على غزة و خلال ال22 يوم اللى فاتوا عاشت الادارة المصرية فى دور الكووول اللى حيحل القضية بترتوفة صباع رجله الصغير و تعاملت ببرود ينقط مع كل الاتهامات الموجهة اليها بالتواطئ و المشاركة فى العدوان على اهلنا فى غزة، و تعاملت بقبضة بوليسية مع مشاعر غضب الملايين فى القاهرة تحديداً... فمشفناش مظاهرة عدلة فى القاهرةو لا اعتصمات ولا الحاجات دى

و ابتدت التصريحات المستفزة لأبو الغيط و تسريبات اكثر استفزازاً لساركوزى و زاد الضغط على الادارة المصرية فدخلنا فى لعبة المبادرة المصرية اللى ايدها الاوربيون، الامريكان و الاسرائيلين واعتبرتها حماس و باقى الفصائل ظلم و اجحاف و مع اول احساس ان قطر حتشد البساط و حتعمل فيهم نفس مقلب لبنان هديت الامور مع حماس و وفد رايح و وفد جاى و اتراك رايحين جايين و يوم الاربع زغرودة يا ولاد حماس و مصر توصلوا لتفاهم فى نقاط الخلاف و حنعرضهم على الصهاينة و على يوم الاحد بالكتير حتكون الدنيا اتزبطت و فلة شمعة منورة على رأى عمرو اديب و ابتديت الهلولة لمصر الريادة العاقلة واثقة من نفسها تصدقوا انا كمان فرحت لكن يا فرحة ما تمت

ليفنى سافرت امريكا و مضت هيا و الشريرة كوندى على شئ مبهم اسمه قال ايه اتفاقية ثنائية لإنهاء تهريب السلاح لغزة ده نص بنود الاتفاق اللى بيضم معاهم الناتو
"http://www.abna2masr.com/ar/index.php?option=com_content&task=view&id=2868&Itemid=1"
و ف نفس الوقت انجلترا، فرنسا و المانيا تطوعوا انهم يبعتوا بوارج حربية الى البحر المتوسط و البحر الأحمر "ده بمناسبة اننا عارفين نخلص من القواعد الامريكية فالأنجليز،الألمان و الفرنساويين قادمون يلا ما هى بلد ابوهم" لمنع تهريب السلاح الى غزة تقولوش يعنى عندهم الجيوش الجرارة ولا يمكن يطلع علينا واحد امريكانى اهبل يقول ان عندهم اسلحة نووية

و بعدين قررت اسرائيل انها توقف اطلاق النار من طرف واحد و المبادرة المصرية اعتقد استعملوها ورق تواليت عشان يبقى ليها لزمة و فجأة صحيت الادارة المصرية بس على ايه احلى قفا ولا دور بأه ولا وساطة ولا ليها لزمة اساساً كانوا بيلعبوا بينا الكورة 22 يوم عشان يعملوا اللى عايزينه و يا سبحان الله اطل علينا السيد وزير الخارجية بطلته البهية و كأنه عنترة فى زمانه شوية تصريحات
" التعنت الاسرائيلى هو السبب فيما يجرى الآن....اسرائيل تشرب من خمر القوة....و ارهاب الشرق الاوسط لن يرهب العرب او المصريين...الاتفاقية الثنائية لا تخصنا"
ده من امتى ان شاء الله...و بعدين خطاب رئاسى شديد اللهجة يطالب اسرائيل بوقف فورى و غير مشروط و الانسحاب الكامل من القطاع "شفته الشجاعة"و خط احمر و اخضر و كلام عن المقاومة مع انى كنت فاكراها كلمة أبيحة و كمان قمة خماشر لغزة مع السلطة بكرة فى شرم الشيخ بتواجد اوربى
و الجديد الجديد الجديد مظاهرة اخوانية من 5000 انسان تجوب شوارع وسط القاهرة فى رعاية امنية شوف حكمة ربنا يا مؤمن فى وسط القاهرة هتافات للقسام و حماس و تتوعد اسرائيل
"يا قسامى يا حبيب دمر دمر تل ابيب...يا للعار مصر مشاركة فى الحصار...بنعاديكى يا اسرائيل كلمة نقولها جيل ورا جيل...على غزة رايحين شهداء بالملايين"
حقيقى اللى يعيش ياما يشوف ربنا يستر اصل اللى جاى شكله ميطمنش

اللهم نصرك

اللهم يا حي يا قيوم يا ذا الجلال والإكرام يا ودود يا ذا العرش المجيد يا فعال لما يريد نسألك اللهم بأسمائك الحسنى وصفاتك العلى واسمك الأعظم يا منشئ السحاب يا منزل الكتاب يا هازم الأحزاب ..اهزم الطغاة المجرمين من اليهود والنصارى الذين يريدون أن يعثوا فسادا في اجساد هؤلاء المسلمين ..وانصر المسلمين والمجاهدين عليهم..اللهم انصرنا عليهم في كل مكان..اللهم أرنا فيهم عجائب قدرتك .. اللهم أحصهم عددا واقتلهم بددا ولا تغادر منهم أحدا..اللهم اجعلهم غنيمة للمسلمين..اللهم اجعل سلاحهم في صدورهم وكيدهم في نحورهم وتدبيرهم تدميرا لهم…اللهم أنزل بهم بأسك وبطشك ورجزك وعقابك وأليم عذابك.. اللهم لا ترفع لهم راية واجعلهم لمن خلفهم آية..اللهم إن زرعهم قد دنا حصاده فهيئ لهم يدا من الحق حاصدة تحصد جذوره وتستأصل شروره..اللهم أهلكهم كما أهلكت إرم وعاد … اللهم صب عليهم سوط عذاب فإنهم أفسدوا في البلاد وقتلوا العباد.. اللهم إنهم لا يرجون لك وقارا.. اللهم إنهم يصفونك بما أنت منزه عنه، سبحانك اللهم عما يقولن علوا كبيرا.. سبحانك اللهم وتعاليت عما يقولون علوا كبيرا…اللهم اشف صدورنا منهم..اللهم عذبهم واجعل قتلهم على أيدي المسلمين ..اللهم أهلك الظالمين بالظالمين وأخرج أمة محمد من بينهم سالمين..اللهم ارحم المسلمين من المستضعفين .. اللهم آمن روعاتهم واستر عوراتهم واحفظ ذرياتهم وارحم ثكالاهم واحفظ أياماهم واجعل أطفالهم شفعاء وقتلاهم شهداء،.. اللهم أقم على الحق دولتهم واجمع على التوحيد كلمتهم .. اللهم انصرهم.. اللهم انصرهم..اللهم انصرهم..اللهم اجعل الملائكة تعينهم..اللهم سدد رميهم .. اللهم سدد رصاصهم…اللهم اجعل سلاحهم غنيمة في أيدي المسلمين…اللهم افتح أبواب الجهاد في كل مكان .. اللهم ارزق المسلمين أبواباً إلى الجهاد في كل مكان ..يا رب العالمين .. اللهم نصرك .. اللهم نصرك .. اللهم نصرك .. ياحي ياقيوم برحمتك نستغيث .. سبحانك ربنا عز جارك، وجل ثناؤك، وتقدست أسماؤك، سبحانك وبحمدك، لا يهزم جندك، ولا يخلف وعدك، يا حي يا قيوم، ياذا الجلال والإكرام
.اللهم إن هؤلاء اليهود قد طغوا وبغوا، وظلموا وأفسدوا، اللهم أنزل عليهم رجزك وبأسك وغضبك وعذابك إله الحق، اللهم منزل الكتاب، ومجري السحاب، وهازم الأحزاب، اهزم اليهود الغاصبين المحتلين، وزلزلهم. اللهم خالف بين قلوبهم، وفرق جمعهم، وشتت شملهم، وزلزل أقدامهم، وأنزل بهم بأسك الذي لا يرد عن القوم المجرمين. اللهم إنا نجعلك في نحورهم، ونعوذ بك من شرورهم.اللهم انصر إخواننا في جميع بلاد المسلمين . اللهم انصر إخواننا في جميع بلاد المسلمين . اللهم كن لهم مؤيداً ونصيراً، ومعيناً وظهيراً.
اللهم إنهم حفاة فاحملهم، وضعفة فقوهم. اللهم ارحم ضعفهم، واجبر كسرهم، وقوي عزائمهم، واحفظ عليهم دينهم، واجمع كلمتهم، ووحد صفوفهم.
اللهم أنت المرتجى؛ لا ملجى إلا إليك. اللهم إنا نسألك لهم فرجاً عاجلاً، ونصراً مؤزراً. اللهم لقد مسهم الضر.اللهم فاكشف عنهم هذه الغمة، واكشف الغمة عن إخواننا المسلمين وفي كل مكان. اللهم انصر إخواننا المجاهدين في سبيلك في كل مكان. اللهم انصرهم في كل مكان يا رب العالمين.اللهم انصر دينك وكتابك وسنة نبيك وعبادك الصالحين. اللهم انصر دينك وكتابك وسنة نبيك وعبادك الصالحين. اللهم من أرادنا بسوء فأشغله بنفسه واجعل كيده في نحره.اللهم صلي وسلم وبارك على نبينا محمد وعلى آله وأصحابه أجمعين. سبحان ربك رب العزة عما يصفون، وسلام على المرسلين، والحمد لله رب العالمين

16 January, 2009

قمة غزة بالصور


الدور المصرى و اعتقد انه لا يحتاج تعليق


و ده دور السلطة اللى بتتخانق و بتقول انها الوحيدة المخولة بالحديث عن القضية الفلسطينة


و تفتكر مين دول "الارهابيين الوحشيين" و لا ميييين؟؟؟

لن نستسلم

لن تنكسر ارادتنا، لن نستسلم فقوافل الشهداء لا تزيدنا سوى صموداً و قوة...شهادؤنا نجوم تتلالاء فى السماء فنسير على دربهم
"ان تكونوا تالمون فانهم يالمون كما تالمون وترجون من الله ما لا يرجون"
ما هدم سيبنى، جراحنا ستشفى، شهداؤنا احياء عند ربهم يرزقون...لكن ابداً لن نستسلم و لن تنكسر ادارتنا، اذا كانت الجزائر تحررت بمليون شهيد فملايين الشهداء فدى الأقصى، فدى ذرة تراب من ارض الرباط
"لن يضروكم الا اذى وان يقاتلوكم يولوكم الادبار ثم لا ينصرون "

13 January, 2009

وينكم يا عرب

منذ خمسينَ عاما
أراقبُ حال العربْ
وهم يرعدونَ ، ولا يمُطرونْ..
وهم يدخلون الحروب ، ولايخرجونْ..
وهم يعلِكونَ جلود البلاغةِ عَلْكا
ولا يهضمونْ..

أنا منذ خمسينَ عاما
أحاولُ رسمَ بلادٍ
تُسمّى -مجازا- بلادَ العربْ
رسمتُ بلون الشرايينِ حينا
وحينا رسمت بلون الغضبْ
وحين انتهى الرسمُ ، ساءلتُ نفسي:
إذا أعلنوا ذاتَ يومٍ وفاةَ العربْ..
ففي أيِ مقبرةٍ يُدْفَنونْ؟
ومَن سوف يبكي عليهم؟
وليس لديهم بناتٌ..
وليس لديهم بَنونْ..
وليس هنالك حُزْنٌ
وليس هنالك مَن يحْزنون
!!

"نزار قبانى"