افتكاساتى عن مجزرة غزة ....1

مش فاهمة اى حاجة من اللى بتحصل فى مصر اليومين دول مش لاقية اى تفسير لادارة ازمة غزة غير اننا اتهبلنا....مش فاهمة حنفية الوطنية اللى نزلت على دماغنا دى جت من انهى داهية، بقدرة قادر كل من يدعم غزة و يتصدى للمجازر اللى هناك و يختلف مع ادارة مصر للأزمة بقا عميل و منافق و بيدعم المشروع الايرانى الصفوى، و رجعنا تانى لنغمة اد ايه مصر ضحت من اجل الكضية الفلستينية، اسطوانة مشروخة و كلام هايف لأن حتى لو نحينا واجبنا الدينى و القومى فى الدفاع عن فلسطين فاحنا من الاخر كنا بنحمى امننا القومى و كنا بنضحى من اجل الحفاظ عليه مش من اجل فلسطين، و بعدين هو ايه علاقة انك تفتح معبر انت تملك السيادة عليه عشان تفك سجن الناس اللى جوة اللى عايشين فى ظروف لا انسانية و بين انك تحارب؟؟؟؟

سقطت ورقة التوت عن النظام المصرى، فقد نظام مبارك مصداقيته عربياً و اسلامياً بغباء متناهى، احداث متعاقبة كلها غلط و من كتر غبواتها مش قادرة استوعبها.....مروراً بمشاركة مصر فى حصار و تجويع الفلسطينين لمدة سنة و نص خوفاً من بعبع الاخوان و حماس يعنى بجد هيافة ملهاش حل، زيارة ليفنى و تصريحاتها المستفزة اللى مينفعش تتقال و جنبها قرطاس جوافة مش وزير خارجية مصر، المجزرة و سقوط الاف الضحايا و الشهداء و احنا قاعدين نتفرج و لا كأن الناس دول من بلاد الواق الواق مش على مرمى بصر من حدودنا، دول حتى بلاد الواق الواق كانوا ارجل منا، فنزويلا طردت السفير الصهيونى و عملت مظاهرات شارك فيها وزير خارجيتهم حقيقى جتنا نيلة فى حظنا الهباب

و بعدبن وصلنا للتصريحات الرئاسية و الزيارات المكوكية و المبادرات و منع المظاهرات و رفض مصر مقابلة الشيخ القرضاوى و من معه ووووووو و دول لينا فيهم قاعدة تانية ان شاء الرحمن

فى السريع كدة النهاردة فى 3 مصريين اصيبوا من قصف اسرائيل للحدود مستنية الهلوله اللى اتعملت بعد وفاة الضابط المصرى برصاص فلسطينى تتعمل النهاردة ولا هو حلال اليهود يعملوا فينا اى حاجة